ໝໍໜຸ່ມ ອິນໂດເນເຊຍ ຕິດໂຄວິດ19 ເສຍຊີວິດກ່ອນງານແຕ່ງເຊີ່ງພົບຫາແຟນສາວ 8ປີ

ແພດໜຸ່ມໄມເຄີລ ໂຣເບິດ ມາຣຳເປ ຄົນອິນໂດເນເຊຍ ສ້າງຄວາມເສຍໃຈໃຫ້ຄົນຈຳນວນຫຼາຍ ຫຼັງຈາກມີລາຍງານວ່າ ແພດໜຸ່ມຜູ້ນີ້ໄດ້ເສຍຊີວິດຈາກໂຄວິດ-19 ກ່ອນທີ່ຕົນຈະໄດ້ແຕ່ງງານອີກບໍ່ພໍເທົ່າໃດມື້ເທົ່ານັ້ນ ຍ້ອນກັບໄປ 1 ອາທິດກ່ອນເສຍຊີວິດ ແພດໜຸ່ມໄດ້ໂພສລົງໃນໄອຈີ ສ່ວນຕົວວ່າ: ຕົນໄດ້ເປັນເຫຍື່ອຂອງໂຄວິດ-19 ອີກຄົນໜຶ່ງໃນປະເທດອິນໂດເນເຊຍ ຫຼັງຈາກໄດ້ຮ່ວມຊ່ວຍຮັກສາຄົນປ່ວຍ ທີ່ເປັນພະຍາດນີ້ ໃນພະແນກສຸກເສີນ

ເຖິງວ່າຈະໃຫ້ຄວາມສຳຄັນປ້ອງກັນກັບພະຍາດນີ້ສະເໝີ ແຕ່ກໍບໍ່ສາມາດຕ້ານທານໄວຣັດດັ່ງກ່າວໄດ້ ແລະ ໄດ້ຕ້ອງເຂົ້າຮັບການປິ່ນປົວ ຢູ່ທີ່ໂຮງໝໍແຫ່ງໜຶ່ງ ໃນທາງຕາເວັນອອກ ຂອງເມືອງຫຼວງ ຈາກາຕ້າ ປະເທດອິນໂດເນເຊຍ ແຕ່ລະຫວ່າງນັ້ນ ແພດໜຸ່ມໄດ້ອັດຄລິບໃຫ້ກຳລັງໃຈບຸກຄະລະກອນການແພດ ໃຫ້ເຂັ້ມແຂງໃນສະຖານະການແບບນີ້

“ສຳລັບຂ້ອຍ ການເປັນໝໍຄືສິ່ງທີ່ພູມໃຈທີ່ສຸດ ແລະ ເຮັດໃຫ້ຂ້ອຍໄດ້ຊ່ວຍເຫຼືອຜູ້ອື່ນ ແລະ ຄົນຈຳນວນຫຼາຍ ແລະ ຂ້ອຍບໍ່ເຄີຍເສຍໃຈ”ນອກນັ້ນນາຍແພດຍັງໄດ້ໂພສຮູບຄູ່ໝັ້ນ ທີ່ຄຽງຄູ່ກັນມາ 8 ປີ ທີ່ມີເນື້ອໃນປະມານວ່າ: ຂອບໃຈຄູ່ໝັ້ນ ເຈົ້າເປັນຂອງຂວັນທີ່ງົດງາມໃນຊີວິດຂອງຂ້ອຍ ຮັກເຈົ້າສະເໝີ, ແຕ່ບໍ່ມີໃຜຮູ້ເລີຍວ່າໂພສນີ້ຈະເປັນໂພສສຸດທ້າຍ, ດ້ານຄູ່ໝັ້ນກໍໂພສລົງໄອຈີອີກວ່າ ຕົນເອງນັ້ນພູມໃຈ ແລະ ຈະແຕ່ງເພງທີ່ໃຊ້ໃນວັນແຕ່ງໃຫ້ສຳເລັດ ພ້ອມບອກຮັກຄູ່ໝັ້ນຜູ້ລ່ວງລັບ

ຫຼັງຈາກນັ້ນກໍໄດ້ມີຜູ້ຄົນມາສະແດງຄວາມຄິດເຫັນຫຼວງຫຼາຍ ພ້ອມໃຫ້ກຳລັງໃຈ ສະແດງຄວາມອາໄລຕໍ່ການສູນເສຍໃນຄັ້ງນີ້, ແພດ ໄມເຄີ້ນ ມາຣຳເປ ເປັນບຸກຄະລະກອນແພດໃນອິນໂດເນເຊຍໃນ 40 ຄົນທີ່ເສຍຊີວິດຈາກໂຄວິດ-19

//graizoah.com/afu.php?zoneid=2280983