ຮູ້ສຶກກັງວົນຫຼາຍ ນຸນີ່ ເລົ່າປະສົບການຊ່ວງກັກຕົວໃນໄລຍະໂຄວິດ-19 ລະບາດຢູ່ກຸງເທບ

ພະຍາດລະບາດກະທົບຊີວິດການເປັນຢູ່ ແລະ ການເຄື່ອນໄຫວຂອງຄົນໃນສັງຄົມເປັນຢ່າງສູງ ລວມທັງຄົນລາວທີ່ຢູ່ຕ່າງແດນ ໃນນັ້ນກໍມີສາວລາວຄົນດັງຢ່າງ ນຸນີ່ ກຸມພົນພັກດີ ເຊິ່ງຕອນນີ້ອາໄສຢູ່ທີ່ບາງກອກ (ກຸງເທບມະຫານະຄອນ) ປະເທດໄທ ກັບໜຸ່ມ ອັອບ ຫວານໃຈຊາວໄທ

ສຳລັບໃຜທີ່ອາດຈະຍັງບໍ່ທັນຮູ້ວ່າ ນຸນີ່ ແມ່ນໃຜ, ນຸນີ່ ແມ່ນສາວລາວເຊິ່ງໄດ້ເຂົ້າຮ່ວມຊອກຫາຄູ່ໃນລາຍການ Take Me Out Thailand ເມື່ອບໍ່ເທົ່າໃດປີກ່ອນ ແລະ ໄດ້ພົບຮັກກັບໜຸ່ມ ອັອບ ໃນລາຍການດັ່ງກ່າວນັ້ນເອງ

ນຸນີ່ ໄດ້ເລົ່າປະສົບການຂອງຕົນເອງໃນໄລຍະການລະບາດຂອງໂຄວິດ-19 ຢູ່ໄທ ໃຫ້ກັບທີມຂ່າວ muan.la ໄດ້ຟັງ ເຊິ່ງພວກເຮົາກໍໄດ້ນຳເອົາບອກຕໍ່ໃຫ້ກັບຜູ້ອ່ານໄດ້ຮັບຮູ້ນຳກັນ

ນຸນີ່ເລົ່າວ່າ ນີ້ເປັນປະສົບການຄັ້ງໃຫຍ່ທີ່ລືມບໍ່ລົງ ແລະ ບໍ່ຄິດວ່າຈະເປັນພະຍາດລະບາດທີ່ຮ້າຍແຮງ ເພາະຢູ່ດີໆກໍມາແບບກະທັນຫັນ ແລະ ມີການປິດປະເທດ. ໃນວັນທີ 24 ມີນາ ທີມງານ ແລະ ແມ່ຂອງສາວນຸນີ່ພາກັນກັບລາວຕັ້ງແຕ່ເຊົ້າ ແລະ ວັນທີ 25 ມີນາ ແມ່ນຮອດລາວແລ້ວ ແລະ ມາຮອດວັນທີ 26 ມີນາ ທາງຝັ່ງລາວກໍມີການປິດດ່ານເລີຍ. ຕອນນັ້ນແມ່ຂອງນຸນີ່ກໍບອກວ່າ ຢາກໃຫ້ຢູ່ກັບໜຸ່ມ ອັອບ ເປັນໝູ່ລາວ ເພາະລາວກໍບໍ່ມີໃຜເລີຍຖ້າຕົນເອງກັບ ກໍເລີຍຕັດສິນໃຈຢູ່ກັບລາວຕັ້ງແຕ່ໂຄວິດ-19 ລະບາດ

ຕອນທຳອິດກຸງເທບເປັນຄືກັບເມືອງຮ້າງເລີຍ ຜູ້ຄົນບໍ່ອອກໄປໃສ ເບິ່ງແລ້ວເປັນຕາຢ້ານ ທຸກຄົນກໍຢ້ານຢູ່ແລ້ວ ເວລາໄປໃສກໍລະແວງ. ເຫັນຄົນໄອກໍຄິດວ່າ ເປັນໂຄວິດ-19 ແລ້ວບໍ່? ຂະໜາດບາງຄັ້ງທີ່ຕົນເອງປວດຫົວ ໂຕຮ້ອນ ໄອໜ້ອຍໜຶ່ງກໍຄິດໄປແລ້ວວ່າຕົນເອງເປັນ ຫຼື ຍັງ ເພາະຕອນນັ້ນຍັງບໍ່ຮູ້ວ່າມັນປ້ອງກັນແນວໃດໄດ້ແດ່. ຈົນມາໄດ້ໄລຍະໜຶ່ງທີ່ເຂົາບອກວ່າ ເຮົາຕ້ອງລ້າງມືໃສ່ສະບູ ໃສ່ແອວກໍຮໍ, ໃສ່ຜ້າປິດປາກ ແລະ ເຮົາກໍເຮັດຕາມຕະຫຼອດ. ຈັບເງິນກໍຕ້ອງລ້າງມື ຈັບຫຍັງກໍຕ້ອງລ້າງມື ບໍ່ວ່າຈະໄປຢູ່ໃສກໍຕາມ  ເມື່ອກັບມາກໍຕ້ອງລ້າງແອວກໍຮໍເລີຍ ເພາະເຮົາຈະເອົາຕິດໂຕໄປຕະຫຼອດ,” ນຸນີ່ ເລົ່າ

ທັງນີ້ ສາວນຸນີ່ ກັບໜຸ່ມອັອບ ເອງກໍໄດ້ເຮັດທຸລະກິດເປັນຮ້ານອາຫານຢູ່ທີ່ກຸງເທບຊື່ຮ້ານ ເຝີແຊບຫຼອຍ. ໃນເລື່ອງຂອງການຄ້າຂາຍ  ໄລຍະທຳອິດທີ່ມີຂ່າວຂອງພະຍາດດັ່ງກ່າວ ກໍໄດ້ມີການລົມກັບໜຸ່ມອັອບວ່າຕ້ອງໄດ້ປິດຮ້ານ ເພື່ອສຸຂະພາບຂອງຕົນເອງ ເພາະຕົນເອງກໍຢ້ານ ບໍ່ຮູ້ວ່າໃຜເປັນແດ່ ຫຼື ບໍ່ເປັນແດ່ ເພາະຕ້ອງໄດ້ໄປຈ່າຍຕະຫຼາດ ໄປພົບຄົນຈຳນວນຫຼາຍ ຈຶ່ງໄດ້ຕັດສິນໃຈປິດຮ້ານໄປ 2 ມື້

ພໍແຕ່ປິດໄປໄດ້ 2 ມື້ເທົ່ານັ້ນລະ ລູກຄ້າທັງໂທ ແລະ ສົ່ງຂໍ້ຄວາມມາທາງເພຈໃນເຟສບຸກແດ່ ແບບຖະຫຼົ່ມທະລາຍ ກໍເລີຍຕັດສິນໃຈເປີດຄືນ. ຄວາມຈິງທີ່ບໍ່ເປີດຮ້ານກໍຍ້ອນໜຶ່ງມາແມ່ນຢ້ານ ແລະ ສອງມາແມ່ນໃນຮ້ານມີແຕ່ຕົນເອງກັບອ້າຍອັອບ ແລະ ດ້ວຍຄວາມທີ່ລາວເປັນຜູ້ຊາຍແດ່ລາວກໍຊ່ວຍວຽກໃນຮ້ານໄດ້ບໍ່ຫຼາຍ. ມື້ທຳອິດກໍເລີຍຕັດສິນໃຈເຮັດເອງຄົນດຽວ ແລະ ກໍມີໝູ່ມາຊ່ວຍໜ້ອຍໜຶ່ງ. ທຸກມື້ນີ້ກໍເຮັດຄົນດຽວທຸກຢ່າງເລີຍ ແຕ່ກໍຖືວ່າໄດ້ຂາຍເລື້ອຍໆ

ນຸນີ່ເລົ່າອີກວ່າ ຈາກແຕ່ກ່ອນທີ່ລູກຄ້າມານັ່ງກິນຢູ່ຮ້ານ ຕອນນີ້ກໍຕ້ອງຊື້ກັບເຮືອນຢ່າງດຽວ ແລະ ກໍມີບໍລິການສົ່ງອາຫານໆທີ່ເພິ່ນມາຮັບໄດ້. ນຸນີ່ ກ່າວວ່າ ໃນສ່ວນຂອງຍອດຂາຍແມ່ນຖືກກະທົບຢ່າງແນ່ນອນ ເຫັນໄດ້ຊັດເຈນວ່າຫຼຸດລົງ

ໃນຕອນທຳອິດເຮົາກໍກັງວົນຫຼາຍ ແຕ່ພໍປັບໂຕໄດ້ ແລະ ເຂົ້າໃຈວ່າເຮົາຕ້ອງປ້ອງກັນໂຕເອງແນວໃດ ເຮົາກໍເລີ່ມຜ່ອນຄວາມກັງວົນແດ່ ເພາະຕົນເອງກໍກຽມໂຕແດ່ແລ້ວ ເພາະເຂົ້າໃຈວ່າເປັນພະຍາດລະບາດ ບ່ອນໃດທີ່ແອອັດ ຫຼື ຊຸມນຸມມີງານຫຍັງເຮົາກໍຈະບໍ່ໄປ ຖ້າບໍ່ຈຳເປັນ ແຕ່ສ່ວນຫຼາຍແມ່ນຈະບໍ່ໄປ

ໃນສ່ວນຂອງການປັບໂຕ ນຸນີ່ ເລົ່າວ່າ ຈາກທີ່ເຄີຍໄປສູນການຄ້າ, ໄປເບິ່ງຮູບເງົາ ຫຼື ໄປກິນອາຫານຢູ່ຮ້ານທີ່ມັກ ກໍບໍ່ໄປອີກເລີຍ ແລ້ວປ່ຽນມາແຕ່ງກິນຢູ່ເຮືອນກິນເອງ ແລະ ພະຍາຍາມເຮັດສິ່ງຕ່າງໆຢູ່ເຮືອນ

“ຕອນນີ້ກໍຖືວ່າລຶ້ງແລ້ວ ອີກສ່ວນໜຶ່ງກໍຍ້ອນວ່າຂາຍເຝີຢູ່ຮ້ານເຮົາເອົງກໍບໍ່ມີເວລາທີ່ຈະໄປເຫງົາ,” ນຸນີ່ ກ່າວ.ພ້ອມນີ້ ສາວນຸນີ່ ຍັງໄດ້ຝາກກຳລັງໄປເຖິງຄົນລາວທີ່ຍັງຢູ່ໄທວ່າ ໃຫ້ສູ້ໄປພ້ອມກັນ ເພາະຫຼາຍຄົນກໍພັດບ້ານພັດເມືອງມາທຳມາຫາກິນ ສົ່ງເງິນກັບໄປໃຫ້ຄອບຄົວຢູ່ຝັ່ງລາວ ບາງຄົນຄົນກໍມາທຸລະກິດ,​ ທ່ອງທ່ຽວ ຫຼື ຈຸດປະສົງອື່ນໆ ເຊິ່ງຫຼາຍຄົນກໍບໍ່ໄດ້ກັບ ເພາະຢ້ານມີຄວາມສ່ຽງໃນການຕິດພະຍາດໃນຕອນທີ່ເດີນທາງ ແລະ ອາດເອົາໄປແພ່ໃສ່ຄົນໃນຄອບຄົວຢູ່ລາວ

//graizoah.com/afu.php?zoneid=2280983