ຟັງຄວາມໃນໃຈຄູອາສາເຮັດວຽກ 7ປີ ໄຮ້ວີ່ແວວລັດຖະກອນຕ້ອງຈໍາໃຈລາອອກທັງນໍ້າຕາ

ຟັງຄວາມໃນໃຈຄູອາສາເຮັດວຽກ 7ປີ ໄຮ້ວີ່ແວວລັດຖະກອນຕ້ອງຈໍາໃຈລາອອກທັງນໍ້າຕາ

ຜ່ານມາແອັດມິນເຄີຍນໍາສະເໜີໄປແລ້ວກ່ຽວກັບປະເດັນຄູອາສາຜູ້ເຮັດວຽກດ້ວຍໃຈເພື່ອລໍຖ້າການໄດ້ເຂົ້າລັດຖະກອນ ມີລາຍຮັບເປັນເງິນເດືອນຈາກລັດເພື່ອລ້ຽງຊີບ, ແຕ່ບໍ່ແມ່ນທຸກຄົນທີ່ຈະປະສົບຜົນສໍາເລັດໃນຄວາມຫວັງດັ່ງກ່າວ ດັ່ງຄູໜຸ່ມຄົນນີ້ຜູ້ເຮັດວຽກສິດສອນນັກຮຽນມາແລ້ວເປັນເວລາ 7ປີ ແຕ່ຍັງໄຮ້ວີ່ແວວການໄດ້ເຂົ້າລັດ ເຮັດໃຫ້ຕ້ອງຕັດສິນໃຈລາອອກທັງນໍ້າຕາ

ສົມນິດ ທິບພະວົງ ໜຶ່ງໃນຄູອາສາສະໝັກໄດ້ເຜີຍຂໍ້ຄວາມເປີດໃຈຜ່ານສື່ອອນລາຍ ລະບາຍຄວາມຮູ້ຕະຫຼອດ 7ປີທີ່ເຮັດວຽກດ້ວຍໃຈວ່າ: ຂໍໂທດລ່ວງຫນ້າເດີພີ່ນ້ອງ ຂ້ອຍຊື່ ທ ສົມນິດ ທິບພະວົງ ອາຍຸ31ປີ ເປັນຄູສອນຢູໂຮງຮຽນ ມ.ຕບ້ານວັງບົງ, ກຸ້ມວັງບົງເມືອງວຽງຄຳ, ແຂວງຫລວງພະບາງ ຂ້ອຍຂໍເລົ່າປະຫວັດໃຫ້ພີ່ນ້ອງຮູ້ແດ່ວ່າເລີ່ມແຕ່ສົກຮຽນ2013ເປັນຕົນມາຕົນເອງໄດ້ເຂົ້າເປັນຄູອາສາສະໝັກຈົນຮອດປີ2020 ລວມເວລາໄດ້ 7ປີແລ້ວແຕ່ກໍ່ຍັງບໍທັນໄດ້ໂຕເລກລັດຖະກອນເທືອ

ປີນີ້ຍິ່ງຊໍ້າຮ້າຍບໍ່ມີຮອດລາຍຊື່ທີ່ຈະເຂົ້າສອບເສັງເພາະເພິ່ນເລືອກບໍ່ແມ່ນສາຍຮຽນ, ເພິ່ນເລືອກສາຍຄະນິດສາດແຕ່ເຮົາພັດຮຽນສາຍພາສາລາວ-ວັນນະຄະດີ, ແຕ່ທັງນີ້ທັງນັ້ນ ກໍ່ຄວນຄຳນຶງເຖິງບັນດານະໂຍບາຍນໍາ, ຄູສອນຢູ່ບ້ານນອກໄຟຟ້າກໍ່ບໍ່ມີ, ສັນຍານໂທລະສັບກໍ່ບໍ່ມີ, ເສັ້ນທາງລົດກໍ່ບໍ່ມີ, ອາໄສທຽວທາງນ້ຳກໍ່ທຸລະກັນດານ, ເຖິງຂະໜາດນີ້ ພາກສ່ວນກ່ຽວຂ້ອງກໍ່ຍັງບໍ່ເຫັນຄວາມຈຳເປັນເລີຍ

ມາຮອດມື້ນີ້ ຄວາມອົດທົນມັນໝົດລົງ, ກໍ່ເລີຍຈຳເປັນຕ້ອງຂໍລາອອກທັງນ້ຳຕາແລ້ວລະທັ້ງໆທີ່ເຄີຍມີຜົນງານໄວ້ຫຼວງຫຼາຍເປັນຕົ້ນແມ່ນ ເປັນຮອງເລຂາຊາວຫນຸ່ມ, ເປັນສະມາຊິກພັກແຕ່ສຸດທ້າຍກະຕ້ອງຖອນຕົວອອກມາເປັນຊາວກະຊິກອນໃນມື້ນີ້, ແນວໃດກໍ່ຕາມຝາກບອກພີ່ນ້ອງຜູ້ໃດທີ່ໄດ້ອ່ານໂພສນີ້ແລ້ວຂໍໃຫ້ຊ່ວຍແຊ ເພື່ອໃຫ້ພາກສ່ວນກ່ຽວຂ້ອງໄດ້ແນມເຫັນ ແລະ ໃຫ້ຄວາມສໍາຄັນກ່ຽວກັບເລື່ອງນີ້ດ້ວຍ

admin